Jamshid Kuchkarov Al Arkkan Training Center delegatsiyasi bilan muzokaralar o‘tkazdi.

Al Arkkan Training Center ta'lim markazi bo'lib, turli sohalarda professional rivojlanish va ta'lim xizmatlarini taqdim etadi. Markaz xalqaro standartlarga muvofiq kurslar asosida o'qitishni ta'minlaydi va yuqori malakali mutaxassislarni jalb qiladi. Markazning asosiy maqsadi mintaqaviy va xalqaro bozorlarning ehtiyojlarini qondirishdir.

Markaz moliya va biznes, professional sertifikatsiya, raqamli texnologiyalar va IT-ta'lim sohalarida ta'lim xizmatlarini ko'rsatishga ixtisoslashgan bo'lib, shuningdek, shaxsiy va korporativ rivojlanish dasturlarini ham taklif etadi.

Uchrashuv davomida tomonlar inson kapitalini rivojlantirish, xususan, jamoat ovqatlanishi va sog'liqni saqlash sohasida xalqaro standartlar asosida mutaxassislarni o'qitish, shuningdek, professional ta'lim sohasidagi kompaniyaning tajribasi, amalga oshirilgan loyihalar va ishlab chiqilayotgan tashabbuslar bo'yicha takliflarni muhokama qildilar.

Bundan tashqari, muzokaralar doirasida davlat-xususiy hamkorlik loyihalarini amalga oshirish istiqbollari, hamshiralarni chet tillarida o'qitish va qisqa muddatli professional ko'nikmalarni oshirish bo'yicha fikr almashildi. Shuningdek, malakali tibbiyot xodimlari va hamshiralarni tayyorlash uchun xalqaro standartlarga javob beradigan ta'lim muassasasini tashkil etish imkoniyati ham muhokama qilindi.

Muzokaralar natijasida tomonlar o'zaro aloqalarni yanada rivojlantirish va kengaytirish, shuningdek, belgilangan yo'nalishlarda tizimli va samarali ish olib borish bo'yicha kelishib oldilar.