EBRD va O‘zbekiston xususiylashtirish va davlat-xususiy hamkorlik sohasidagi loyihalarni muhokama qildilar.

Uchrashuv davomida tomonlar o‘tgan davrda amalga oshirilgan qo‘shma loyihalar va ularning natijalariga, kelajakdagi hamkorlik yo‘nalishlariga, shuningdek, O‘zbekistonning iqtisodiy barqarorligini va ijtimoiy farovonligini ta’minlashga qaratilgan ustuvor loyihalarga alohida e’tibor qaratishdi.

Jumladan, muloqot davomida tomonlar davlat ishtirokidagi banklarni xususiylashtirish jarayonlarini tezlashtirish, xususiy sektorni qo‘llab-quvvatlash, davlat ishtirokidagi korxonalarni rivojlantirish va transformatsiya qilish, shuningdek, davlat-xususiy hamkorlik dasturlari asosida amalga oshirilayotgan loyihalarni muhokama qildilar.

Ta’lim sohasida maktablar va talaba yotoqxonalari qurish bilan bog‘liq loyihalarga alohida e’tibor qaratildi.

Bundan tashqari, muzokaralar davomida tomonlar "yashil" o‘sishni ta’minlash, energiya samaradorligini oshirish va "yashil" texnologiyalarni keng joriy etish, kichik va o‘rta tadbirkorlikni rivojlantirish va qo‘llab-quvvatlash, shuningdek, ayollar va yosh tadbirkorlar uchun moliyaviy xizmatlarga kirish imkoniyatlarini oshirish masalalari bo‘yicha fikr almashdilar.

Shuningdek, issiqlik ta’minoti infratuzilmasini yangilash va aholi uchun "yashil" va innovatsion texnologiyalar asosida barqaror xizmatlar taqdim etishga qaratilgan konkret loyihalarni ishlab chiqish masalalari muhokama qilindi.

Suv resurslaridan samarali foydalanish, sug‘orish loyihalarini amalga oshirish va qishloq xo‘jaligida suvni tejovchi texnologiyalarni keng qo‘llash masalalariga alohida e’tibor qaratildi.