Dubayda 247 ming dollar qarzi bo'lgan o'zbekistonlikka yordam ko'rsatildi.

Genkonsulxona ma'lumotlariga ko'ra, 1957 yilda tug'ilgan N.J. fuqaro Dubayda qiyin ahvolda qolgan holda, yordam so'rab murojaat qildi va O'zbekistonga qaytish va to'plangan qarzni to'lashni iltimos qildi.

Ma'lum bo'lishicha, u 1996 yilda mavsumiy ishlar uchun Dubayga kelgan va turli savdo nuqtalarida ishlagan. 2001 yildan 2025 yilgacha esa turli sabablarga ko'ra, vatandoshimiz BAA hududida noqonuniy yashagan.

Avvalo, genkonsulxona unga konsullik-huquqiy yordam ko'rsatdi, vaqtincha turar joy taqdim etdi va oziq-ovqat bilan ta'minladi.

Tekshirish jarayonida, noqonuniy yashash muddati davomida uning qarzi 901 600 dirham (247 013 AQSh dollari)ni tashkil etgani aniqlanib, ushbu summani to'lamasdan BAA hududini tark eta olmasligi ma'lum bo'ldi.

Genkonsulxona xodimlari BAA huquqni muhofaza qilish va boshqa vakolatli organlari bilan olib borgan muzokaralar natijasida N.J. ning barcha qarzlarini bekor qilish va yuzaga kelgan muammolarni hal qilish bo'yicha kelishuvga erishildi.

15 fevral kuni genkonsulxona diplomatiyasi va «Ayollar va bolalarga yordam markazi» xayriya tashkiloti yordamida unga «Dubay – Toshkent» reysi uchun chipta sotib olindi va O'zbekistonga jo'natildi.