Bolalar ombudsmani Samarqandda jinsiy zo'ravonlik qurboniga aylangan qiz bilan uchrashdi.

Oliy Majlisning bolalar huquqlari bo'yicha vakili Surayyo Raxmonova, Samarqand viloyati Koshrobat tumanida guruh tomonidan jinsiy zo'ravonlik qurboniga aylangan maktab o'quvchisi bilan uchrashdi.

Jinoyatni sodir etishda 9 kishi gumon qilinmoqda, ulardan biri prokuratura xodimi. Ularning sakkiztasi hibsga olingan, yana biri qidirilmoqda. Jinoyat ishi 31-oktabrda qo'zg'atilgan. Tergov harakatlarini viloyat IIB olib bormoqda.

Bolalar ombudsmani, tergovning dastlabki bosqichida jabrlangan qizning protsessual huquqlari qanday ta'minlanganini aniqladi. Tergovga bolaning qonuniy vakili, o'qituvchi va advokatning ishtirokiga alohida e'tibor qaratildi.

Bundan tashqari, Surayyo Raxmonova tergovchilarga qizning ishtirokida tergovni va protsessual harakatlarni yanada yumshoq o'tkazish va bolalar psixikasiga zarar yetkazmaslik bo'yicha tavsiyalar berdi.

Bolalar ombudsmani voyaga yetmagan qiz va uning onasi bilan alohida suhbatlashdi. Jabrlanganlarga to'liq tibbiy, psixologik va ijtimoiy yordam ko'rsatilmoqda.

«Suhbat davomida qizning onasi ommaviy axborot vositalari va jamoatchilikdan ushbu jinoyatning tafsilotlarini e'lon qilmaslikni so'radi, chunki har bir bunday xabar uning qizi va oilasi uchun katta emotsional zarba bo'ladi», - deb aytilgan xabarda.

Bolalar ombudsmani, ushbu ish jinsiy zo'ravonlik bilan bog'liq ekanligini va jinoyat ishining tafsilotlarini oshkor qilish, jumladan, OAVda keng yoritilishi bolaning manfaatlariga zid ekanligini ta'kidladi, chunki bu voyaga yetmagan shaxsning shaxsiy hayoti, sha'ni va qadr-qimmatiga ta'sir qiladi.