Ozarbayjon tadbirkori Emin Agalarov Charvakda turizm markazini quradi.

Charvak suv ombori, daryolar, qorli tog'lar va go'zal o'rmonlar tufayli Bostanlik tumani yilning istalgan vaqtida dam olish uchun jozibador joy hisoblanadi. So'nggi besh yil ichida tumanga 2 trillion so'mdan ortiq investitsiyalar jalb qilindi, bu esa 13 ming o'rinli 59 ta yangi turistik ob'ektni ishga tushirish imkonini berdi.

Ozarbayjon tadbirkori Emin Agalarov va boshqa yirik investorlar Charvak suv ombori qirg'og'ida Sea Breeze Uzbekistan xalqaro turistik markazini qurishga tayyor ekanliklarini bildirdilar.

Loyihada dam olish zonalari, plyajlar, sport maydonchalari, mehmonxonalar, kottejlar va turar joy komplekslarini yaratish, shuningdek, xalqaro brendlar ostida do'konlar, restoranlar va xizmat ko'rsatish punktlarini ochish ko'zda tutilgan. Turli festivallar, konsertlar va madaniy tadbirlar o'tkazilishi rejalashtirilmoqda. Mehmonlar uchun qulaylik yaratish maqsadida ko'l bo'ylab ko'prik quriladi.

Prezident bu taklifni qo'llab-quvvatladi va huquqiy va infratuzilma masalalarini hal qilish uchun bosh vazir boshchiligida ishchi guruh tuzishni topshirdi. Loyihani jahon tajribasini inobatga olgan holda bosqichma-bosqich amalga oshirish rejalashtirilmoqda.

Eslatib o'tamiz, Shahrisabz tumanida rossiyalik investorlar ishtirokida "Gelon" yil bo'yi faoliyat yuritadigan kurort tashkil etiladi.