Prezident davlat byudjeti to'g'risidagi qonunni amalga oshirish va iqtisodiyotni rivojlantirish bo'yicha chora-tadbirlar bilan tanishdi.

Qonun 17 modda va 10 ilovadan iborat bo'lib, unda kelgusi yil uchun asosiy iqtisodiy ko'rsatkichlar aks etgan. Xususan, bu yilda mamlakatning Yalpi ichki mahsuloti 6 % ga o'sishi kutilmoqda. Konsolidatsiyalashgan byudjet daromadlari 431 trillion so'm, xarajatlari esa 480,5 trillion so'm bo'lishi rejalashtirilgan.

Shu bilan birga, davlat byudjetining daromadlari 308,5 trillion so'm miqdorida belgilangan, xarajatlari esa davlat maqsadli fondlariga o'tkazmalarni hisobga olib 344,8 trillion so'm miqdorida bo'ladi.

2025 yil uchun prognozga ko'ra, Qoraqalpog'iston byudjeti hamda viloyatlar va Toshkentning mahalliy byudjetlari 65,8 trillion so'm daromadga, xarajatlar esa 84,3 trillion so'mga yetishi kutilmoqda. Shuningdek, respublika byudjetidan mahalliy byudjetlarga 18,5 trillion so'm miqdorida budjetlararo o'tkazmalar berilishi ko'zda tutilgan.

Bu yilda ham byudjet xarajatlarining ijtimoiy yo'nalishi saqlanib qoladi. Davlat byudjetining umumiy mablag'larining 52 % i ta'lim, sog'liqni saqlash, ijtimoiy himoya sohalariga, shuningdek, fan, madaniyat, sportni rivojlantirish va kam ta'minlangan fuqarolarni uy-joy bilan ta'minlashga yo'naltirilishi kutilmoqda.

Tumanlar va shaharlarning mustaqilligini kengaytirish maqsadida, ularning byudjetlarida aylanma soliq, yer solig'i va yuridik shaxslarning mulk solig'i bo'yicha barcha tushumlar, shuningdek, jismoniy shaxslar daromadidan soliqning kamida 50 %i qoldiriladi. Bu yirik soliq to'lovchilar tomonidan to'lanadigan soliklarga ta'sir qilmaydi.

Mahalliy byudjetlar davlat mulkini xususiylashtirishdan olingan 50 % tushumlarni o'zlarida qoldirishlari mumkin.